1 Peter 2

Shekwoyi Aza

1Ntu cenu fye la nuwun gmiya n bugba. Fye to zhin aɓo n gye fye zhin aza manayi n munaficiyi gwo dna n mim, Fye ku tna-gaiciya ya, n eshei, n na za ɓedai n ɓa vun. 2– 3Nsaiye shi fye kpelo shi Dagayi ye fye nsunyi, fye ku ɓenukwoyi ya vinya, kwocedna, eshe, n na katai. Fye zhin atna fya mwa fi n fye gnigni, fyei zan madara zafun nya shi n bwi-ci yi, she oɓi zhin wa cibwi woi zan ɓeɓe shin nyi. 4Fye ɓe Kristi aba, owo nu zhin Nyakun shishiyi Apma nya n Shekwoyi mi nya tu nyi. Koda shike aza la wo ciwyegba wo na pmailo n latui njesun n Shekwoyi aba n wa kni wo tu naza she nyi.

5Nsaiye fye ku ze akuta awyewyeyi, Shekwoyi wa zhin apma cei wa mi nyakun, kniyi du lo ɓoʼa? Fye ɓe Wa ba, (ofye n fye ku zhin anya go-go yi nwa ba ntu Yesu Kristi ɓo nyi,) fya ga wo anya n ɓa dawo. 6Shi littafi ada, “Shawye, mi tnu n Kristi yi wa ze kuta kni-kniyi nyakun-bwakonu nya omi ikklisiya nya, mi ta dna aza vinyikwo n ɓa kpema won.”

7E, wo n latu yi lo n fya ba n fye ku gaiciya ga nyi, n na zaba n ɓa la wa ɓo na nyi, To, “Kuta ho n na a nyakunmiyi la kwa ɓo nanyi, kwo la ze kuta nyakun-bwakonu nya nkwo du n mwa-mwa n na pmai dna nyakun mi nyi.” 8Littafi a je ci ge, “Wo zhin kuta bonyi-ce nya nu n na zaho aba. Apma n kwo ɓei zhin ɓa miya.” Ɓa ɓei kni a bonyi ntuge ɓata ye ɓa wo Shekwoyi Ɓeda, kwo ɓa vi wo ɓeyem, ntu cenu tata ye mimiya nya, ɓei vi ɓa.

9Ama fye to wulo lonun, ntuge Shekwoyi la fye kni n wohin yi, fye zhin Esu a pirist nu, fye gyi-gyiyi lo n bmiya, fye zhin Shekwoyi anyanu, aɓeye vinya ntu ge fya wu aza shi Shekwoyi wa yi fye n wyegmaa mi woi lo fye fi n wo buzangna ɓewowoyi nya. 10Nsapai fye to ɓei zhin nyaho nun, nsaiye fye zhin Shekwoyi anya nu, nsapai fye to ɓei kpe Shekwoyi alheri ye n mwan, nsaiye okwo nu la fya wye-wyeyi shando.

11Oma zaje, fye zhin azhiɓeyi nu ya. Shikwonyi ofya yi hin-hin lo n ʼshe mi nu, mi gyi fye wye fya bui anyi dada nukwoyi ye nya si, ɓa to zhin ofye nun, ntuge ɓa sunkun n ʼfya wye-wyeyi.

12Fye zhin peceiye shi fye sase n fya knuzhiyi n ɓa zhin atnaviyi nyi, ntuge ɓa gye fye ngye aɓo nukwoyi zhin yi, shi ɓa gye fye ɓemana ɓa ɓei ci Shekwoyi ntu fya tnu-tnu manayi ɓo esa n Kristi ɓa jezeɓe cei. 13Ntu Dagayi ɓo, fye vi gwannati doka doho-dohoyi ɓo kwo esu anya nu ngye ekni tukwoda. 14N esu abmazhinyi yi, ntuge wa tnu n ɓai ɓata abenukwoi zhinyi yi nu, ɓa ci aza n ɓa zhi ɓemanai ce.

15Shekwoyi nufi nu efya sese manayi ɓa kun aza gbe n ɓa ci Nabari Manayi aɓenya to ɓai kpe oɓoye n kwo ɓa mi kwa zhin ɓa nyim, ntuge ɓa to shin kwo iko towom. 16Fye ku pwo owa, ama kwo to wu nu ge fye zhin ɓenukwoyim, fye sase n gye aza nɓa ku pwo, ɓa zhin Shekwoyi ɓeye nu gmanyi n saho-sahoi yi.

17Ga zaho-zahoi mwa-mwa, Ye n na Yesu-viyi yi nbwaho-bwahoi vinya, wo Shekwoyi dna, ha ga gwamnati mwa-mwa.

18Afyenu, fye ga fya dagayi mwamwa fya zhin oɓo ɓa gna fye vinya to ge sai ɓai nsunsun gyei nu kwo ye-yem, ama kwo ɓai zhin aza nukwoyi nu. 19Fye zhin Shekwoyi godiya n na ga fye wahala ntu ɓemanai zhin ɓo. 20Gaiciya, gyiba to lon, n na ga fye wahala ntu ɓe nukwoyi zhin ɓom, ama n fya zhin ɓemanayi fya sin wahala ntu ce har fya zhin hakuri dna n na zhin-hi mi, kwo zhin kwa da Shekwoyi n mwa.

21Wahala ye pya dna lo n tnu-tnu mi n Shekwoyi wa ga fye. Kristi nwo ɓei sin wahala n fye ɓo nyi, wonu zhin fye e-fye, fye vi wa pita ʼbwi. 22Wo to ɓei zhin laifim, to wa ca katam. 23A kni wo akmi, to wa gba akmi tam, esa na ɓei gawo wahala wo to ɓei kun akalam, ama wa wohin fa dna n Shekwoyi akun n wo da owa ntna awyekwo nyi. 24Wonu ɓei la eyi alaifi kaya n wohin nayi, esa n wo ɓei fi tu n zundu nyi, n na bai ya ze afifiyi n laifi aba, ya se ase gyi-gyi-yi nsayi. Ntuge ntu wo aci ɓonu yi-i bwa kagna. 25Ngye akni fye ɓei ku bwi Shekwoyi zokwo, ama nsaiye fye la jezeɓe da fye ʼkniknayi ofye awye-wyeyi guyi n wo gu fye n nanya kasayi nyi.